युवाको सामूहिक पुँजीबाट पर्यटनमा नयाँ पहल, काठमाडौंमा खुल्यो ‘ऐश्वर्य बुटिक होटल’

काठमाडौं । रोजगारी र अवसरको खोजीमा ठूलो संख्यामा युवा विदेश पलायन भइरहेका बेला नेपालमै सम्भावना खोज्दै उद्यमशीलता र पर्यटन प्रवर्द्धनमा योगदान पुर्‍याउने उद्देश्यसहित युवाहरूको सामूहिक लगानीमा काठमाडौंमा ‘ऐश्वर्य बुटिक होटल’ सञ्चालनमा आएको छ।

विदेशमा होइन, आफ्नै देशमा केही गर्नुपर्छ र नेपालमै उद्यम तथा रोजगारीका अवसर सिर्जना गर्नुपर्छ भन्ने सोचबाट करिब तीन वर्षअघि स्थापना भएको ऐश्वर्य इन्भेस्टमेन्ट ग्रुपले आफ्नो पहिलो परियोजनाका रूपमा काठमाडौंको गौशाला, पिङ्गलस्थानमा ऐश्वर्य बुटिक होटल सञ्चालनमा ल्याएको हो।

आरामदायी कोठा र आकर्षक वातावरण

होटलमा पाहुनाको सहजता, आराम र सुविधालाई ध्यानमा राखेर कोठाहरू तयार गरिएको छ। आकर्षक र व्यवस्थित कोठा, आधुनिक सुविधासहितको वातावरण र पाहुनाको आवश्यकतालाई प्राथमिकता दिने सेवा प्रणाली होटलका विशेषताका रूपमा रहेका छन्।

लामो यात्रा गरेर आउने पर्यटकदेखि धार्मिक भ्रमण, व्यावसायिक काम तथा पारिवारिक प्रयोजनका लागि काठमाडौं आउने पाहुनासम्मलाई आरामदायी बसाइको अनुभव प्रदान गर्ने लक्ष्य होटलले राखेको छ। होटलको कोठाको बनावट, सजावट र समग्र वातावरणले पाहुनालाई घरबाट टाढा रहँदा पनि सहज र आत्मीय अनुभूति दिलाउने अपेक्षा गरिएको छ।

स्वादमा नेपालीपनदेखि अन्तर्राष्ट्रिय परिकारसम्म

ऐश्वर्य बुटिक होटलले आवास सुविधासँगै खानपानलाई पनि विशेष प्राथमिकतामा राखेको छ। नेपाली स्वाद रुचाउने पाहुनादेखि भारतीय तथा अन्य विदेशी पर्यटकको खानपानको चाहनालाई ध्यानमा राखेर विविध परिकार उपलब्ध गराउने योजना होटलको छ।

ख्यातिप्राप्त तथा अनुभवी सेफहरूको नेतृत्वमा तयार हुने स्वादिष्ट र गुणस्तरीय व्यञ्जनले होटलको खानपान सेवालाई थप विशेष बनाउने अपेक्षा गरिएको छ। नेपाली, भारतीय तथा अन्तर्राष्ट्रिय स्वादका परिकारमार्फत फरक–फरक खानपान संस्कृतिका पाहुनालाई सन्तुष्ट पार्ने लक्ष्य होटलले लिएको छ।

खानाको स्वाद, परिकारको गुणस्तर, सरसफाइ र प्रस्तुतिलाई विशेष ध्यान दिँदै पाहुनालाई सम्झनलायक खानपानको अनुभव प्रदान गर्ने होटलको उद्देश्य रहेको छ।

आत्मीय आतिथ्य सत्कारलाई विशेष प्राथमिकता

होटलको अर्को महत्वपूर्ण पक्ष कर्मचारीहरूको व्यवहार र आतिथ्य सत्कार हो। पाहुनालाई सम्मानपूर्वक स्वागत गर्ने, उनीहरूको आवश्यकता बुझ्ने र बसाइ अवधिभर सहज सेवा उपलब्ध गराउने विषयलाई होटल व्यवस्थापनले प्राथमिकतामा राखेको छ।

व्यवस्थित सेवा, विनम्र व्यवहार, सरसफाइ र समयमै सेवा उपलब्ध गराउने प्रतिबद्धतासहित होटलले पाहुनालाई आत्मीय वातावरण प्रदान गर्ने लक्ष्य राखेको छ। आधुनिक सुविधा मात्र नभई मानवीय व्यवहार र आत्मीय सत्कार पनि गुणस्तरीय होटल सेवाका महत्वपूर्ण आधार हुन् भन्ने मान्यताका साथ होटल अघि बढेको छ।

युवाको सामूहिक लगानी र स्वदेशमै सम्भावना खोज्ने अभियान

ऐश्वर्य इन्भेस्टमेन्ट ग्रुपका अध्यक्ष अमृत पोखरेलका अनुसार विदेश जाने युवाको बढ्दो प्रवृत्तिका बीच नेपालमै केही गर्नुपर्छ भन्ने सकारात्मक सोच भएका युवाहरूको सामूहिक प्रयासबाट समूह स्थापना गरिएको हो।

नेपालमै सम्भावना खोज्दै लगानी गर्ने, पर्यटन क्षेत्रको विकासमा योगदान पुर्‍याउने र स्वदेशमै उद्यमशीलताको वातावरण निर्माण गर्ने उद्देश्यले समूह अघि बढेको अध्यक्ष पोखरेलले बताए।

उनका अनुसार ऐश्वर्य बुटिक होटल समूहको पहिलो परियोजना हो। आगामी दिनमा पनि नेपालमै रहेर विभिन्न क्षेत्रमा लगानी विस्तार गर्ने र पर्यटन प्रवर्द्धनमा योगदान पुर्‍याउने समूहको सोच रहेको छ।

होटलका अन्य लगानीकर्तामा श्रीकृष्ण पन्तल गायत युवा उद्यमीहरू रहेका छन् भने होटलको प्रबन्ध निर्देशकको जिम्मेवारी अर्जुन अधिकारीले सम्हालिरहेका छन्।

पर्यटनसँगै रोजगारी सिर्जनाको अपेक्षा

नेपाल प्राकृतिक, धार्मिक, सांस्कृतिक तथा ऐतिहासिक पर्यटनको प्रचुर सम्भावना भएको मुलुक हो। तर, पर्यटन क्षेत्रको सम्भावनालाई पूर्ण रूपमा उपयोग गर्न गुणस्तरीय पूर्वाधार, व्यवस्थित सेवा र व्यावसायिक आतिथ्य संस्कृतिको विकास आवश्यक छ।

यही आवश्यकतालाई आत्मसात् गर्दै सञ्चालनमा आएको ऐश्वर्य बुटिक होटलले काठमाडौंको पर्यटन सेवामा नयाँ आयाम थप्ने अपेक्षा गरिएको छ। होटल सञ्चालनसँगै प्रत्यक्ष रोजगारीका अवसर सिर्जना हुनुका साथै स्थानीय उत्पादन, सेवा तथा आपूर्ति क्षेत्रलाई समेत सहयोग पुग्ने विश्वास गरिएको छ।

युवाहरू विदेशिने मात्र होइन, स्वदेशमै लगानी गरेर व्यवसाय सञ्चालन गर्न र अरूलाई समेत रोजगारी दिन सक्छन् भन्ने सन्देश ऐश्वर्य बुटिक होटलको स्थापनाले दिएको छ।

नेपालमै सम्भावना छ, नेपालमै लगानी गर्न सकिन्छ र नेपालमै बसेर सफल उद्यमी बन्न सकिन्छ भन्ने विश्वासलाई व्यवहारमा उतार्ने युवाहरूको प्रयासका रूपमा ऐश्वर्य बुटिक होटललाई हेर्न सकिन्छ।